Servisio di Atmishon ku lokalidat temporal pa otorgá pèrmit
Willemstad – Servisio di Atmishon ta informá ku entrante djaluna 14 di yüli 2025 su balinan pa otorgamentu di título di residensia (stèmpel den pasport) lo no ta ubiká mas na Lokèt di Pèrmit na Saliña 127. Esaki ta nifiká ku tur kliente ku tin un sita pa tuma stèmpel den pasport mester akudí na Kranshi, Roodeweg 42, den e edifisio kaminda antes tabata traha reibeweis.
E trabounan di remodelashon na Servisio di Atmishon ta andando ainda. E periodo di kual Lokèt di Pèrmit tabata disponel pa Servisio di Atmishon a terminá. Pa por sigui brinda servisio na kliente, Servisio di Atmishon lo ta temporalmente ubiká na Kranshi.
E adaptashon di lokalidat ta solamente pa klientenan ku tin un sita pa tuma stèmpel, voucher di restitushon, prueba di regreso, baimentu definitivo i prolongashon di estadia turístiko. Temporalmente no por duna informashon personalmente na kliente. Pa tur informashon por manda un e-mail na info@immigrationcur.org òf un mensahe na Facebook i Instagram Admission Office Curaçao.
Servisio di Atmishon a pone dos number di telefòn disponibel pa hasi informashon. E numbernan di telefòn ta 733-2081 i 7333-2083. Por yama e dos numbernan aki di djaluna pa djaweps di 8:00 am pa 12:00 pm. E numbernan aki ta temporalmente disponibel te na momentu ku muda bèk pa Punda. Na momentu ku muda e numbernan aki lo no ta aksesibel mas pa públiko.
Klientenan ku mester di un sita ta traha esaki via di wèpsait www.immigrationcur.org. Tur korespondensia (pòst) pa Servisio di Atmishon, por keda entregá tambe na Krashi (edifisio kaminda antes tabata traha reibeweis) durante orario pa públiko. Orario pa públiko ta di djaluna pa djaweps di 8:00 am pa 3:00 pm i djabièrnè di 8:00 am pa 12:00 pm.
Servisio di Atmishon ta pidi pa tuma bon nota di e kambio. Alabes ta gradisí su klientenan pa e komprenshon i ta sigui traha pa brinda e servisio kustumbrá.