Maneho di “Rib’e Lugá”

E reglanan pa atmishon i estadia di estranheronan na Kòrsou ta stipulá den e Ordenansa Nashonal di Atmishon i Ekspulshon, Landsverordening Toelating en Uitzetting (LTU).  Minister di Hustisia ta responsabel pa e maneho di atmishon. E Organisashon di Atmishon, Toelatingsorganisatie Curaçao (TO) ta enkargá di ehekushon di e maneho akí. E programa Rib’e Lugá ta aliniá ku esaki i ta keda implementá den e kuadro legal eksistente. E programa aki ta ofresé un solushon temporal i regulá pa grupo spesífiko.

Konseho di Minister riba proposishon di minister di Hustisia, a bai di akuerdo ku un trayekto di registrashon i legalisashon, yamá Rib’e Lugá. Pa e maneho [klik aki]. E trayekto aki ta ofresé un solushon temporal i regulá pa personanan sin indokumentá na Kòrsou.

Ken por bini na remarke?

Si bo ta kumpli ku e siguiente kondishonnan, bo por bini na remarke pa un pèrmit di estadia temporal den kuardo di e trayekto di Rib’e Lugá:

• Bo ta na Kòrsou aktualmente i bo ta indokumentá;
• Bo tabata na Kòrsou promé ku 13 di novèmber 2025, esaki ta e asina yamá fecha di referensia;
• Bo no ta forma un peliger pa órden públiko òf seguridat.

Fecha di referensia: Promé ku 13 di novèmber 2025

Un di e kondishon nan pa bini na remarke pa un pèrmit temporal a base di Rib’e Lugá ta ku bo mester a drenta Kòrsou promé ku 13 di novèmber 2025.

• Si bo a drenta legalmente, bo por proba esaki ku e stèmpel di entrada den bo pasport. Esaki ta e kaso, por ehèmpel, ora bo a drenta ku avion òf barku krusero.
• Si bo no a drenta legalmente (pa medio di boto via un puerto no ofisial), bo mester entregá un dokumento verifikabel ku ta mustra ku bo tabata na Kòrsou promé ku e fecha di referensia. E siguiente dokumentonan lo keda aseptá en todo kaso:

1. Prueba di transferensia di plaka na bo nòmber, por ehèmpel Western Union, Pagadero, Moneygram;
2. Un deklarashon di un partner di konfiansa, trusted partner, ku ta indiká ku bo tabata na Kòrsou promé ku e fecha di referensia. E partner(nan) di konfiansa, trusted partners, na e momento aki ta:

• UNHCR;  
• PADF;
• Konseho di Iglesianan;
• IOM;
• Salú pa Tur;
• Kònsùlnan (honorario) (general);
• Un deklarashon di un institushon gubernamental òf edukashonal di Kòrsou;

3. Otro dokumentonan ku, di forma ophetivo, por demostrá ku bo tabata na Kòrsou promé ku e fecha di referensia, manera registrashonnan òf kontaktonan ku instansianan gubernamental na Kòrsou i/o pèrmit di estadia ku a vense.

Kontratonan di hür, deklarashonnan di partíkulanan i dokumentonan similar no lo keda aseptá komo prueba independiente. Por konsiderá esakinan por solamente si nan ta ophetivamente verifikabel, por ehèmpel pa medio di transferensianan bankario.

Seguridat i kòntròl

Garantisá órden i seguridat públiko ta un parti importante di Rib’e Lugá.

Esaki ta nifiká ku:

Mester entregá un Deklarashon di Bon Kondukta, Verklaring Omtrent het Gedrag (VOG) di e último lugá di residensia (no mas bieu ku tres (3) luna) di bo i di kada miembro di famia di 18 aña i mas.

Bo no ta bin na remarke pa partisipá den e programa si bo tin antesedente penal òf si bo ta forma un riesgo pa órden públiko òf seguridat nashonal. Pa e motibu aki ta di importansia pa bo no tin antesedente penal. Ademas, no por tin indikashonnan konkreto ku bo ta un peliger pa órden públiko òf seguridat nashonal.

E pèrmit di estadia temporal ta keda otorgá bou di kondishonnan. Esaki ta nifiká ku si despues resultá ku bo ta forma un menasa pa órden públiko òf seguridat nashonal, e pèrmit por keda konsiderá komo otorgá di forma indebido i por keda revoká. Bo ta na altura i ta di akuerdo ku kòntròl i verifikashon por tuma lugá na kualke momento den koperashon ku partnernan lokal i internashonal. Esaki por enserá konsulta entre otro den e banko di dato di INTERPOL.

Kontrol i verifikashon por tuma lugá tambe despues ku e pèrmit di estadia temporal a keda otorgá. Si despues resultá ku a duna informashon inkorekto òf ku tin riesgonan pa órden òf seguridat públiko, e pèrmit di estadia temporal ainda por keda revoká.

Gastunan

Tin gastunan mará na tratamentu di un aplikashon pa Rib’e Lugá.

E gastunan aki ta dependé di:

• E propósito di estadia;
• E durashon di e pèrmit pidí.

Tarifanan i gastunan atministrativo Empleo:

• 1 aña XCG 655.–
• 2 aña XCG 1270.–
• 3 aña XCG 1885.–

Tarifanan i gastunan atministrativo Negoshi propio:

• 1 aña XCG 635.–
• 2 aña XCG 1250.–
• 3 aña XCG 1865.–

Tarifanan i gastunan atministrativo Re-unifikashon di famia:

• 1 aña XCG 655.–
• 2 aña XCG 1280.–
• 3 aña XCG 1905.–

Otro gastunan:

– Di akuerdo ku e Ordenansa Nashonal di Stampia, Stempelverordening 1908, deklarashonnan ofisial mester kontené un stampia di Xcg 10.-. Deklarashonnan sin stampia lo no keda prosesá.

Opheshon i apelashon

Bo no ta di akuerdo ku e desishon riba bo aplikashon? Bo por:

• entregá un opheshon;
• I, si ta nesesario, presentá un apelashon.

Esaki ta keda hasí konforme e stipulashonnan di e e Ordenansa Nashonal di Hurisdikshon Atministrativo, Landsverordening Administratieve Rechtspraak (LAR). E límite di tempu pa hasi esaki ta 6 siman.