Servisio di Atmishon ku lokalidat temporal
Willemstad – Servisio di Atmishon ta informá ku entrante djaweps 26 di sèptèmber 2024 su balinan pa otorgamentu di título di residensia (stèmpel den pasport) lo ta temporalmente ubiká na Lokèt di Pèrmit na Saliña. Esaki ta nifiká ku tur kliente ku tin un sita pa tuma stèmpel den pasport mester akudí konforme nan orario di sita na Lokèt di Pèrmit (Vergunningenloket).
Aktualmente tin algun mantenshon ku mester tuma lugá na e sistema di èrko den sala di espera pa kliente ku ta pone ku no por brinda servisio na kliente na nos lokalidat. Pa por sigui duna e servisio kustumbrá na kliente, Servisio di Atmishon tin un lokalidat temporal na Lokèt di Pèrmit (Vergunningenloket) na Saliña 127 (Eurobuilding).
E adaptashon di lokalidat ta solamente pa klientenan ku tin un sita pa tuma stèmpel, voucher di restitushon, prueba di regreso i baimentu definitivo. Temporalmente no por duna informashon personalmente na kliente. Pa tur informashon por manda un e-mail na info@immigrationcur.org òf un mensahe na Facebook i Instagram Admission Office Curaçao òf via telefòn 733-2000. Klientenan ku mester di un sita ta traha esaki via di nos wèpsait www.immigrationcur.org. Tur korespondensia (pòst) pa Servisio di Atmishon, por keda entregá tambe na Lokèt di Pèrmit durante orario pa públiko.
Servisio di Atmishon ta gradisí su klientenan pa e komprenshon i ta sigui traha pa keda brinda e servisio kustumbrá.