INTEGRASHON RESPONABEL

Kiko ta Integrashon Responsabel?

Ku un pèrmit di estadia bo por regla bo kosnan na un manera mas fásil, manera un siudadano di Kòrsou por hasi esaki. E proyekto Integrashon Responsabel ta brinda oportunidat na abo komo persona indokumentá pa bira legal na Kòrsou.

Ken ta bini na remarke pa Integrashon Responsabel?

Bo ta bini na remarke pa Integrashon Responsabel si bo a drenta Kòrsou di forma legal promé ku 13 di mart 2020. Mas aleu bo mester ta kumpli ku tur rekisito. Tin rekisito general ku ta konta pa tur hende i tambe tin rekisito spesífiko ku ta apliká, dependiendo di e meta pa kua bo ta solisitando un pèrmit di estadia temporal. Pa por prosesá bo petishon, bo mester yena un aplikashon kompleto, konforme e lista di rekisito.

Rekisitonan general

  1. Komprobante di pago;
  2. Formulario di petishon online kompletamente yená;
  3. Kopia di pasaport bálido (si ta trata di mas ku un nashonalidat, kopia di tur pasaport);
  4. Kopia di akta di nasementu1 (no mas bieu ku 2 aña);
  5. Antesedente penal di e lastu lugá kaminda bo tabata biba na momentu ku bo a yega Kòrsou. E dokumento aki no por ta mas bieu ku 13 di mart 2019;
  6. Deklarashon di dunadó di trabou yená i firmá, huntu ku un kopia di un identifikashon bálido di e dunadó di trabou2
  7. Deklarashon di garantia3 kompletamente yená i firmá dor di e dunadó di trabou ku un stampia di NAf. 10,=;
  1. Depende di e pais kaminda a nase/kasa/keda rekonosé, mester legalisá òf apostiá e akta di nasementu/kasamentu/rekonosementu. No ta nesesario hasi esaki si ta trata di un pais ku ta forma parti di Union Europeo.
  2. Si e dunadó di trabou no ta kai bou di artíkulo 1, insiso a di LTU, mester presentá ku kopia bálido di e deklarashon di “niet van toepassing” / “van rechtswege”, pèrmit di estadia i kopia bálido di pasport.
  3. Si e persona ku ta para garantia (persona individual òf “eenmanszaak”) ta kasá, su kasá tambe mester firma e deklarashon di garantia i presentá un kopia di su identifikashon bálido.

TUMA NOTA:

TIN MAS REKISITO KU TA APLIKABEL, DEPENDE DI E MOTIBU PA KUA BO TA SOLISITÁ UN PÈRMIT DI ESTADIA. YENA E FORMULARIO SOLAMENTE SI BO TA KUMPLI KU TUR REKISITO I SI BO POR ENTREGÁ TUR DOKUMENTO SOLISITÁ. TA HAÑA E FORMULARIONAN ADISHONAL NA KUA TA REFERÍ NA DJE VIA DI E LINK AKI. BO POR DOWNLOAD, YENA, FIRMA I UPLOAD NAN BÈK.

Durante kua periodo mi por entregá e petishon?

Bo por entregá bo petishon pa estadia temporal entrante 22 di mart 2021 te ku 22 di sèptèmber 2021. E periodo máksimo pa trata tur petishon ta 6 luna.

Proseso

  1. Tuma bon nota di tur rekisito i dokumento solisitá
  2. Organisá tur dokumento i yena tur formulario nesesario
  3. Yena e formulario di aplikashon digital di forma korekto i kompleto. E formulario aki ta konsistí di e siguiente komponentenan:
    • Meta di bo estadia
    • Datonan personal (di esun ku ta hasi petishon i eventualmente pareha i yu(nan)
    • Adrès lokal
    • E-mail i number di telefòn
    • Dato di persona ku ta para garantia
    • Fecha for di ki dia bo ta na Kòrsou
    • Antesedente penal
    • Apoderashon (si ta aplikabel)
  4. Upload tur dokumento nesesario
  5. Manda e formulario di petishon
  6. Na momentu ku bo entregá bo petishon lo bo risibí un konfirmashon di esaki
  7. Bo por kontrolá status di bo petishon riba petishonnan prosesa. Por tuma kontakto ku Servisio di Atmishon te na momento ku e término pa tratamentu di e petishon pasa. E término aki ta 6 luna despues di entrega di e petishon.

Si bo petishon keda honrá, bo por traha un sita pa pasa tuma bo título di residensia via sita@immigrationcur.org

TUMA NOTA:

BO MESTER PRESENTÁ PERSONALMENTE NA SERVISIO DI ATMISHON PA TUMA BO TÍTULO DI RESIDENSIA, KU TUR E DOKUMENTONAN MANERA SPESIFIKÁ DEN BO DESISHON.

Pregunta

Pa pregunta, por fabor bishitá nos página di Facebook: Toelatingsorganisatie Curacao