Servisio di Atmishon ku proyekto “Tuma Bo Pèrmit”
Willemstad – Servisio di Atmishon ta informá ku entrante djaluna promé di desèmber te ku djamars 30 di desèmber 2025 ta inisiá ku proyekto “Tuma Bo Pèrmit”. Meta di e proyekto aki ta pa duna mas tantu persona posibel oportunidat pa tuma nan título di residensia den forma di un stèmpel, sin tin ku traha sita.
Durante último lunanan Servisio di Atmishon a prosesá bastante petishon pa un pèrmit di estadia. Esaki a pone ku hopi petishon a keda kla na mes momentu i e kantidat di sita ku por a keda traha pa dia a yega su máksimo. Pa remediá e situashon ku hopi persona no por haña un sita lihe, Servisio di Atmishon lo inisia e proyekto aki durante luna di desèmber 2025.
Pa por duna mas persona e oportunidat pa tuma nan pèrmit, lo hasi e proyekto estilo di walk-in. Esaki ta nifiká ku personanan ku a risibí un desishon positivo i ku tin tur e dokumentunan nesesario original pa tuma nan pèrmit, no mester traha un sita. E personanan aki por pasa di djaluna pa djaweps di 8:00 am pa 3:00 pm i riba djabièrnè di 8:00 pa 12:00 pm. Durante e proyekto lo parti un kantidat maksimo di number pa dia, konforme e kapasidat di persona ku Servisio di Atmishon por akapará. E último orario ku por tuma number di djaluna pa djaweps ta 2:30 pm i riba djabièrnè 11:30 pm.
Mirando ku tin sitanan traha kaba te ku fin di desèmber 2025, ta keda na e persona si e ke akudí konforme su sita òf si e ta pasa durante e proyekto sin sita. Ora ku presentá mester notifiká ku kier kanselá e sita. Si skohe pa mantené e sita, e persona ta haña turno konforme orario di su sita.
Pa mas informashon tokante Servisio di Atmishon por subi website www.immigrationcur.org òf página di facebook i instagram Admission Office Curaçao.