Promé kartanan di desishon di Rib’e Lugá entregá; periodo di registrashon ta wòrdu prolongá

Promé kartanan di desishon di Rib’e Lugá entregá; periodo di registrashon ta wòrdu prolongá

Willemstad – Den e trayekto di Rib’e Lugá, riba 30 di yüli 2026, a entregá e promé tres kartanan di desishon. E kartanan di desishon a keda otorgá na tres ruman menor di edat. Ku e promé entrega di kartanan di desishon, Rib’e Lugá ta marka un momento importante den e trayekto di registrashon i legalisashon.

Señora Saran Magdalena Inderson, Hefe di Kabinèt di Ministerio di Hustisia, a entregá e kartanan di desishon na nòmber di minister Hato. E entrega a tuma lugá den presensia di señora Jennyfer Suares, Hefe di Maneho i Asuntonan Hurídiko na Servisio di Atmishon, señor René Eisden, Hefe di Departamento di Atmishon i Estadía na Servisio di Atmishon, señora Kishara Kroon, Projectmanager di Rib’e Lugá, i señora Elsa Penny, Ambulant Justitieel Medewerker Gezinsvoogdij.

Den e trayekto di Rib’e Lugá, konforme e maneho di minister Hato, menornan di edat ta haña prioridat. P’esei a opta pa trata e aplikashonnan di e tres ruman menor di edat aki promé.

Banda di e promé entrega, e periodo di registrashon di Rib’e Lugá ta keda prolongá. E prolongashon ta  resultado di e interés kontinuo den e trayekto i e nesesidat pa yudansa den e  proseso di registrashon. E fecha nobo di klousura di e periodo di registrashon, lo keda ke anunsiá via e kanalnan ofisial di Rib’e Lugá.

Durante e periodo di registrashon prolongá, ta posibel pa sigui registrá direkto via www.ribeluga.cw. No tin mester di un intermediario pa entregá un registrashon. Ademas, Rib’e Lugá lo organisámas dia  di registrashon na Servisio di Atmishon. Tambe lo tin seshonnan di registrashon den diferente bario, pa yudansa por ta mas aksesibel i mas serka di e grupo di enfoke.

Via e wèpsait di Rib’e Lugá tambe ta posibel pa hasi un sita pa haña asistensia ku registrashon.

“Ku e promé kartanan di desishon entregá na menornan di edat, Rib’e Lugá ta kumpli ku e prioridat ku e trayekto ta duna na e grupo aki. Ku e prolongashon di e trayekto, nos lo sigui enfoká riba duna informashon, guia i oportunidatnandi registrashon aksesibel pa personanan ku ta bin na remarke pa Rib’e Lugá,” asina Rib’e Lugá ta indiká.

Rib’e Lugá ta un trayekto temporal di registrashon i legalisashon pa personanan ku ta permanesé indokumentá na Kòrsou i ku, semper ku nan kumpli ku e kondishonnan, por bini na remarke pa un pèrmít temporal di estadia. Ademas di registrashon i legalisashon, e trayekto ta kontribuí tambe na haña un mihó bista  riba e grandura, situashon i karakterístikanan di e grupo aki. E informashon aki ta importante pa desaroyo di un maneho di migrashon dirigí riba futuro diKòrsou.

Rib’e Lugá ta hasi un yamada na personanan ku ta bin na remarke pa e trayekto pa hasi bon uso di e periodo di registrashon prolongá, informá nan mes na tempu i entregá nan registrashon.

Pa mas informashon òf pregunta tokante Rib’e Lugá:

Telefòn: +5999 5119984
WhatsApp: +5999 5119984
E-mail: info@ribeluga.cw
Wèpsait: www.ribeluga.cw

Pa informashon aktualisá, sigui tambe e kanalnan ofisial di Rib’e Lugá:

Facebook: Rib’e Lugá
Instagram: @ribe_luga
WhatsApp Channel: Rib’e Lugá – Nos Lugá, Bon Reglá