Rib’e Lugá ta keda prolongá: registrashon ta posibel ainda

Rib’e Lugá ta keda prolongá: registrashon ta posibel ainda

Willemstad – E periodo di registrashon di Rib’e Lugá ta keda prolongá. Esaki ta nifiká ku registrashon ta posibel ainda pa personanan ku ta bin na remarke pa e trayekto. E fecha nobo di klousera di e periodo di registrashon lo keda anunsiá via e kanalnan ofisial di Rib’e Lugá.

Pa motibu di e gran interes den e trayekto di Rib’e Lugá i e nesesidat kontinuo pa yudansa den e proseso di registrashon a tuma e desishon di prolongá e periodo di registrashon. Den e periodo ku a pasa, hopi persona a hasi uso di seshonnan di informashon, dianan di registrashon i otro momentunan di kontakto pa hasi pregunta i haña yudansa ku nan registrashon.

Durante e prolongashon, ta posibel pa sigui registrá direkto via www.ribeluga.cw. No tin mester di intermediario pa entregá un registrashon.

Ademas, Rib’e Lugá lo organisá masdia di registrashon na Servisio di Atmishon. Tambe lo tin seshonnan di registrashon den diferente bario, pa e yudansa por ta mas aksesibel i mas serka di e grupo di enfoke. Fecha, orario i lokalidat lo keda anunsiá via e kanalnan ofisial di Rib’e Lugá.

Via e wèpsait di Rib’e Lugá tambe ta posibel pa traha sita pa risibí asistensia ku registrashon.

“E gran interes pa e trayekto di Rib’e Lugá ta demostrá ku tin nesesidat pa risibí  yudansa práktiko. Ku e prolongashon aki, nos ke duna personanan ku ta bin na remarke pa e trayekto mas oportunidat pa informá nan mes mihó, risibí asistensia i entregá nan registrashon,” asina Rib’e Lugá ta indiká.

Rib’e Lugá ta un trayekto temporal di registrashon i legalisashon pa personanan ku ta permanesé indokumentá na Kòrsou i ku, semper ku nan kumpli ku e kondishonnan, por bin na remarke pa un pèrmít temporal di estadia. Banda di registrashon i legalisashon, e trayekto ta kontribuí na mas klaridat tokante tamaño, situashon i karakterístikanan di e grupo aki. E informashon aki ta importante pa desaroyo di un maneho di migrashon na Kòrsou.

Rib’e Lugá ta yama tur persona ku ta bin na remarke pa e trayekto pa no warda i hasi bon uso di e periodo di registrashon prolongá.

Pa mas informashon òf pregunta tokante Rib’e Lugá:

Telefòn: +5999 5119984
WhatsApp: +5999 5119984
E-mail: info@ribeluga.cw
Wèpsait: www.ribeluga.cw

Pa informashon aktualisá, sigui tambe e kanalnan ofisial di Rib’e Lugá:

Facebook: Rib’e Lugá
Instagram: @ribe_luga
WhatsApp Channel: Rib’e Lugá – Nos Lugá, Bon Reglá