Estranhero menor di edat

Representantenan legal di un estranhero menor di edat ku ta biaha pa Kòrsou tambe mester tene kuenta ku e prinsipionan menshoná. E estranhero menor di edat mester presentá e dokumentonan ku apliká na su pais, for di kua por proba ku e ta biahando ku su mayornan legítimo òf ku el a haña pèrmit pa e biahe, i di e forma ei, pa biaha ku e persona mayor di edat apuntá.

Den kaso ku no por presentá e dokumentonan nesesario pa establesé identidat di e mucha i pa garantisá un estadia seif, por pasa ku no ta permití e mucha menor di edat pa drenta Kòrsou òf ku, den kuadro di investigashon nesesario, ta pone e mucha (temporalmente) bou di supervishon di outoridatnan kompetente.

E dokumentonan ku mester entregá pa estranhero no-residente menor di edat ku ta biaha ta: 

1. 1. Akta di nasementu, dokumento di identifikashon i tambe dokumento di biahe di e mucha menor di edat; 
   2. Dokumentonan di identifikashon di mayor(nan) outorisá ku tin tutela pa por duna outorisashon òf di e tutor;
   3. Dokumentonan di identifikashon bálido di e persona mayor di edat ku ta biaha ku e mucha; 
   4. Dokumentonan ku ta komprobá ken ta e representante legal di e mucha menor di edat ku ta biaha.
   5. Den kaso di sirkunstansianan partikular, mester demostrá un ke otro pa medio di dokumentonan ofisial legal. Esaki nan mester ta apostiá òf legalisá.⁸
   6. Formulario di outorisashon firmá dor di e mayor(nan) ku no ta biaha ku e mucha, den kua ta apuntá e persona mayor di edat ku ta responsabel, i den kaso ku ta aplikabel, ku ta biaha ku e mucha i tambe e persona mayor di edat ku ta responsabel pa e mucha durante su estadia.

Estadia turístiko pa un estranhero menor di edat

Mester mèldu un estranhero menor di edat ku ta biaha su so na Unidat pa Supervishon di Estranhero i Kòntròl di Frontera (“Unit Vreemdelingen Toezicht en Grensbewaking”), pa medio di un formulario di outorisashon kompletamente yená i firmá dor di e mucha su representante(nan) legal legítimo, huntu ku e dokumentonan nesesario, manera indiká mas ariba.

Estadia largu pa un estranhero menor di edat

Den kaso ku e mucha menor di edat ta drenta pa keda un temporada largu, e mester ta disponé di un pèrmit di estadia (temporal) òf un karta di bon boluntat di Servisio di Atmishon Kòrsou ku ta indiká esaki, ku meta pa sea studia òf pa unifikashon di famia.

⁸ Dependiendo di e pais di nasementu/rekonosementu/kasamentu mester sea apostiá òf legalisá e akta di nasementu/akta di rekonosementu/akta di kasamentu. Esaki no ta konta pa paisnan ku ta forma parti di Union Europeo. Apostia ta konta pa paisnan ku ta kai bou di e Tratado di Apostia (“Apostilleverdrag” – Tratado pa eliminá legalisashon rekerí pa aktanan públiko internashonal, ‘s-Gravenhage, 05-10-1961)