Vigilansia di Frontera
Aeropuerto
Haf
Vigilansia di Frontera
Vigilansia di Frontera
Departamentu Vigilansia di Frontera ku ta ehersé kòntròl na tantu aeropuerto i haf ta kai bou di Unidat Supervishon di Stranhero.
Komo parti di Kuerpo Polisial Kòrsou (KPC), e departamentu akí tin lo siguiente tambe komo mishon:
“Nos, hòmber- i muhénan di Kuerpo Polisial Kòrsou, ta duna un kontribushon efektivo i di kalidat haltu pa hasi bida den komunidat di Kòrsou bibabel i sigur – un komunidat kaminda hende por biba den harmonia ku otro”.
Sirbi i protehá nos komunidat riba e tereno akí tambe ta prioridat máksimo pa e departamentu akí.
P’esei ta hasi uzo di un Sistema di Maneho di Frontera (Border Management System – B.M.S.) na frontera di Kòrsou pa asina registrá entrada i salida di individuonan.
Turistanan mester tene nan mes na LTU, Resolushon di Atmishon i maneho di stranhero mantené pa Minister di Hustisia na momentu di drenta i tambe sali for di pais.
Minister di Hustisia (e outoridat máksimo di Atmishon) a bini ku instrukshon pa mantenshon di e maneho akí i ta sumamente importante pa no duna stranheronan ku no ta kumpli ku e eksigensianan di atmishon, menshoná den e Resolushon di Atmishon, akseso na teritorio di Kòrsou.
Ta importante pa un biahero mustra un pasport bálido. Pa sierto pais, bo mester di un visa tambe.
Ta trata na logra pa biaha ku sédula entre paisnan karibense. Huntu ku esei, un turista mester indiká kiko ta su meta, durashon di estadia i medionan di eksistensia durante su estadia.
Na nòmber di Minister di Hustisia (outoridat di Atmishon) ta averiguá di forma estrikto si stranheronan ku mester haña atmishon, ta kumpli ku eksigensianan di atmishon manera menshoná den e Resolushon di Atmishon i e reglanan di maneho di Outoridat di Atmishon.
Visa
Den Lei di visa pa Reino ta regla stipulashon- i kondishonnan relashoná ku otorgamentu di visa pa akseso na paisnan di Reino. Ofisialmente, e Lei di visa pa Reino i e Regulashon eksonerashon di obligashon di visa Lei di visa pa Reino a drenta na vigor for di 1 di yüli 2018.
Pa Kòrsou, e outoridat kompetente ta Minister di Hustisia.
For di 10 di òktober 2010 un visa, si e no ta teritorialmente limitá, ta bálido pa tur isla / pais den e parti karibense di Reino Hulandes. Na momentu ku drenta e pais, e visa mester ta bálido. Un visa no ta duna derechi riba akseso i atmishon, pero ta un di e eksigensianan pa haña akseso i atmishon.
En prinsipio, un visa ta bálido pa e parti karibense di Reino Hulandes. Si riba e visa tin pará “bálido pa” T.B.G.V (visa ku balides teritorialmente limitá), e ora ei esaki ta solamente bálido pa e pais indiká komo destinashon prinsipal.
Pais ku no ta rekerí visa
E Regulashon eksonerashon obligashon di visa Lei di visa pa Reino ku a drenta na vigor for di 1 di yüli 2018, ta inkluí tur nashonalidat, kargadónan di pasport diplomátiko, i tambe diferente pais ku ta rekerí visa ku bou di kondishonnan ta eksonerá òf ekskluí di e obligashon di visa.
Pais ku ta rekerí visa
Sobrá di e individuonan ku nashonalidat di e paisnan ku no ta inkluí den e regulashon anteriormente menshoná, mester di un visa pa biaha pa Kòrsou.
Personanan ku mester di visa, mester hasi un petishon pa nan visa i tin e huntu ku nan promé ku nan biaha pa Kòrsou.
En prinsipio, mester entregá e petishon pa un visa personalmente na un embahada, konsulado (mishonnan diplomátiko) di Reino Hulandes òf si ta aplikabel, un dunadó di servisio eksterno.
Pa informashon tokante hasimentu di petishon pa un visa i pa informashon tokante e orarionan di apertura i pa traha un sita, por tuma kontakto ku embahada òf konsulado di Reino Hulandes den e pais di orígen. Por haña mas informashon tambe via website di e embahada òf konsulado konserní. Por haña e adrès- i websitenan di mishonnan diplomátiko di Reino Hulandes pa pais via website di Ministerio di Asuntunan Eksterno: Biaha pa Hulanda òf parti karibense di Reino | Nederlandwereldwijd.nl | Ministerio di Asuntunan Eksterno
Aeropuerto
Aeropuerto
Curaçao International Airport, ofisialmente, ‘Hato International Airport’ (anteriormente Dr. Albert Plesman International Airport), ta e úniko aeropuerto ofisial i legal di Kòrsou.
Mayoria biahero ta yega Kòrsou via aeropuerto.
Ora ta biaha pa Kòrsou ta importante, banda di e dokumentonan di biahe usual, pa yena un Tarheta di Embarke – Desembarke (ED-card) obligatorio di forma kompletu i segun bèrdat i pa mesora entregá esaki na momentu di yegada òf salida for di Kòrsou na e ofisial di desembarke.
Ta preferá si por yena un tarheta ED (digital immigration card) di forma digital. Por yena e tarheta ED online den komfortabilidat di bo kas promé ku bo hasta kuminsá ku bo buelo pa Kòrsou. Ku introdukshon di e Tarheta ED online, ta redusí konsiderablemente, e kantidat di tempu ku ta keda den rei na imigrashon. Por hasi esaki riba e siguiente website: www.dicardcuracao.com
Pasa Imigrashon na momentu di yegada i salida pa biaheronan riba 12 aña, ta sosodé dor di e-Gates. E tarheta ED digital lo ta di akuerdo ku e Sistema Outomatisá di Maneho di Frontera (Automatic Border Management System), indiká komo e-Gates. E ora ei e biahero ta drenta e pais via un portal digital.
Haf
Haf
Di akuerdo ku artíkulo 20 di Resolushon di Atmishon, no ta desembarká individuonan otro kaminda ku no ta na e hafnan di Willemstad, Caracasbaai, Fuikbaai i Bullenbaai.
Den kaso di barkunan grandi, e ofisialnan di desembarke mes lo subi bordo pa tuma pasport/ buk’i marinero pa registrá e biahero den e Sistema di Maneho di Frontera. Den kaso di barkunan chikí, e biaheronan mes mester bai Imigrashon (haf).
Banda di e funshonarionan di Vigilansia di Frontera ku ta forma parti di KPC i ku ta enkargá ku kòntròl di frontera na aeropuerto / haf, ta enkargá Wardakosta tambe ku e tareanan relashoná ku kòntròl di frontera marítimo. Konforme artíkulo 16 di Lei di Reino Wardakosta, e Ministernan di Hulanda, Aruba, Kòrsou i St. Maarten ku ta involví den Wardakosta su ehersementu di tarea, mester sòru pa duna direktor i personal di Wardakosta, outorisashon di supervishon i detekshon den kuadro di un bon ehersementu di e tareanan di Wardakosta. A duna e parti ehekutivo di personal di Wardakosta ku ta enkargá ku ehekushon di e tareanan di detekshon, e status di agente polisial ekstraordinario na Kòrsou.
Renunsiamentu di responsabilidat
Ministerio di Hustisia ta responsabel pa publikashon di informashon riba e website aki. A buska e informashon kuidadosamente i koutelosamente. Ministerio di Hustisia ta hasi su máksimo esfuerso pa mantené e informashon mas aktual posibel. No por optené niun derechi for di e website aki. Ministerio di Hustisia ta manehá e website aki. Por kompartí e informashon ku tin riba e website aki, basta menshoná e fuente.