Biaha ku Mucha

INTRODUKSHON

Protekshon di mucha ta un prioridat di Gobièrnu di Kòrsou en general i di Ministerio di Hustisia en partikular. Tantu tratadonan internashonal tokante protekshon di menornan di edat komo lei i regulashonnan lokal ta forma e kuadro legal pa esaki.

“Menornan di edat ta esnan ku no a hasi 18 aña ainda, no ta òf tabata kasá i ku tampoko a keda deklará mayor di edat pa medio di aplikashon di artíkulo 1:253ha”.¹

Artíkulo 234² ta stipulá ku un menor di edat no tin mag di biaha sin pèrmit di su representantenan legal (mayor(nan) outorisá òf tutor). Generalmente un mucha ta biaha ku (un di) su mayornan, su so, ku amigu, ku skol òf un instituto kaminda e ta studia òf hasi deporte. Pa seguridat di e mucha ta importante pa por proba na e ámtenar di imigrashon ku e ta biahando ku pèrmit di e mayor(nan) òf tutor(nan) responsabel.

Minister di Hustisia ta haña sumamente importante pa durante e kòntròl na imigrashon, aeropuerto/haf, un ke otro kana ku fasilidat. Den kuadro di esaki ta importante pa e mucha òf e mayor, personanan/instansianan ku ken e menor di edat ta biaha, ta na altura di kua dokumento nan mester presentá pa mustra ku e mucha i esnan ku ta biaha kuné tin pèrmit di e mayor(nan) outorisá òf e tutor pa biaha ku e mucha. Basá riba esaki ta stipulá pa medio di e sirkular aki kua ta e dokumentonan ku mester presentá na Kòntròl di frontera ora ta biaha, di manera ku e mucha por biaha di forma legal.

E dokumentonan ku mester presentá ta inkluí:

1. Dokumentonan di identifikashon i dokumentonan di biahe di e mucha;
2. Dokumentonan di identifikashon di e mayor(nan) outorisá ku tin tutela pa por duna pèrmit òf di e tutor korespondiente; 
3. Un pèrmit hurídikamente bálido, por eskrito i firmá, ku ta kontené informashon tokante e biahe, e personanan mayor di edat ku ta kompañá e mucha i e periodo di biahe;
4. Dokumentonan di identifikashon di e persona mayor di edat ku ta kompañá e mucha;
5. Dokumentonan ku por demostrá ken ta e representante legal di e mucha ku ta biaha.

E siguiente personanan por ta e representantenan legal i duna pèrmit pa e biahe: 

1. E mama; den kaso ku e menor di edat no ta rekonosé;
2. Un di e mayornan; esaki ta e kaso ora un di e mayornan so tin tutela riba e mucha. Sea e tata a rekonosé e mucha pero ta e mama so tin tutela òf den kaso di un desishon di Korte kaminda un di e mayornan so tin tutela riba e mucha. E mayor aki por ta e tata tambe; 
3. Ámbos mayor; ku otro palabra, den kaso di tutela kompartí. Esaki ta e kaso ora e mayornan ta kasá, ora un desishon di Korte stipulá ku ámbos mayor tin tutela riba e mucha òf ora ámbos mayor a deklará na Korte ku nan tur dos ke ta enkargá ku tutela riba e mucha.
4. Tutor(nan); Korte ta apuntá tutor.

¹Artíkulo 233 di Buki 1 di Kódigo Sivil di Kòrsou

²Artíkulo 234 di Buki 1 di Kódigo Sivil di Kòrsou