Opheshon i apelashon

Opheshoná òf apelá kontra un desishon di Servisio di Atmishon

Bo no ta di akuerdo ku e desishon di Servisio di Atmishon? E ora ei bo por entregá un opheshon serka Servisio di Atmishon òf apelá serka wes kontra e desishon akí. Riba e página akí, bo ta lesa kon esaki mester sosodé.

Opheshon

Bo tin 6 siman di tempu pa entregá un karta di opheshon. E término ta kuminsá for di e dia ku a manda e desishon di Servisio di Atmishon pa bo.

Kon bo ta entregá un karta di opheshon?                                                                                                                                                Bo mester (preferiblemente) manda e karta di opheshon via e-mail pa info@immigrationcur.org. Na momentu ku bo manda bo karta di opheshon, bo ta risibí un notifikashon ku Servisio di Atmishon a risibí bo karta. Lo bo risibí un konfirmashon di parti di e departamentu di opheshon, pa asina bo sa for di ki momentu nos a kuminsa trata e opheshon. 

Manda e karta di opheshon pa:
Servisio di Atmishon Kòrsou
Tauber Building
Prinsenstraat 90, Punda
Willemstad, Kòrsou

Eksigensianan di e karta di opheshon

Bo mester entregá bo karta di opheshon di forma skibí i di tur manera e mester kontené e siguiente datonan:

  • Bo fam, nòmbernan dilanti i lugá di biba i, si ta un apoderado ta entreg’é, fam, nòmbernan dilanti i lugá di biba di e apoderado tambe;
  • Un deskripshon bon kla di e dekreto ku e karta di opheshon ta dirigí kontra dje;
  • Dikon bo ta opheshoná;
  • Un indikashon di loke bo ke/ kiko e dekreto deseá mester ta;
  • Bo firma òf firma di bo apoderado;
  • Un adrès di bo eskoho na Kòrsou, si bo no ta biba na Kòrsou.

Huntu ku e karta di opheshon, si ta posibel, ta añadí un kopia di e desishon ku bo no ta di akuerdo kuné i e dokumentonan relashoná ku esaki.

Un apoderado

Bo por laga un otro persona tambe entregá bo karta di opheshon. E siguiente personanan akí por entregá un opheshon pa bo:

  • Un abogado.
  • Un representante legal. Esaki ta un mayor, tutor òf otro hende ku ta regla bo asuntunan.
  • Un apoderado spesial. Esaki ta un persona ku ta haña bo outorisashon pa manda un  opheshon pa bo. Den un apoderashon skibí bo ta pone ken bo ta apoderá i kiko bo ta apoderá e persona akí p’e. Bo apoderado mester manda un kopia di e apoderashon skibí akí (na momentu di entrega di e karta di opheshon) pa Servisio di Atmishon.

Tratamentu di e karta di opheshon

Lo konfirmá resepshon di bo karta di opheshon mas pronto posibel. Ora ku e opheshon ta atmisibel (ta kumpli ku tur eksigensia legal), lo trata kontenido di bo karta di opheshon. Por ta ku lo pidibo pa dokumentonan adishonal òf pa mas  informashon. Ta posibel tambe ku lo tene un oudensia. Durante e oudensia lo bo haña oportunidat pa duna un aklarashon riba bo karta di opheshon. Servisio di Atmishon ta hasi esfuerso pa trata bo karta di opheshon denter di e término legal di máksimalmente sinku (5) luna.

Revoká karta di opheshon

Bo a kambia di idea i ke revoká bo opheshon? E ora ei, bo mester hasi esaki di forma skibí.

No ta di akuerdo ku desishon riba opheshon

Bo no ta di akuerdo ku Servisio di Atmishon su desishon òf tratamentu di bo opheshon? E ora ei, bo por apelá den Korte di Promé Instansia na Kòrsou. Tin gastunan mará na esaki si.

Bo por skohe tambe pa salta e prosedura di opheshon na Servisio di Atmishon i apelá direktamente den Korte di Promé Instansia na Kòrsou.

Den e karta di apelashon, bo ta skibi dikon bo no ta di akuerdo ku Servisio di Atmishon su desishon (riba bo opheshon). Añadí tambe, un kopia di e desishon di Servisio di Atmishon. Wes lo evaluá bo karta di apelashon.

Renunsiamentu di responsabilidat

Ministerio di Hustisia ta responsabel pa publikashon di informashon riba e website aki. A buska e informashon kuidadosamente i koutelosamente. Ministerio di Hustisia ta hasi su máksimo esfuerso pa mantené e informashon mas aktual posibel. No por optené niun derechi for di e website aki. Ministerio di Hustisia ta manehá e website aki. Por kompartí e informashon ku tin riba e website aki, basta menshoná e fuente.